Parosifa arow fain Yon-ke siisimok

Miimow opora

Parosifa fain Kristen teeria woos mua-ke woos mua oko siisimomak. Mua nain unuma Gaius. O parosifa-pa Gaius unuma wiar purupok, moram wi Kristen papako baliwep wia asipam-ikua. Ne pun maakek, no Diotrefes maa uru-urufami uuwowa onam-ike naakek.

3 John

1 Aria yo Yeesus Krais teeria woos mua-ke no yena emar Gaius parosifa fain siisimomiyem, emar eena manek akena nefa kookaliyem nain.

2 Emar eliwa, no kukusa name saliwap sira makena-pa ikon. Ne mia eliwa nefar ikainok naep, ne pun uuwow unowa baliwep nefar ikim-ikainok naep Mua Maneka fariyem. 3 No Yeesus Krais opor makena opin nain kekanep naap ikon. Naeya ona teeria mua papako-ke ekapemi naap efa maakiwkin miimap manek akena kemeliyem. 4 Makena, ni yena muuka wiipa unowa opor makena baliwep opam-ikaiman, nain niar miimap manek akena kemeliyem. Yo maa oko naap-ko me kemeliyem, weetak.

5 Aria emar eliwa, Yeesus Krais teeria mua papako owow epasia-pa niar ekapemik nain no me wia amisaren, nain nena sira eliwa ookami anane baliwep wia naapin. 6 No sira nain wi teeria nain-ke ekapemi i yia maakemik. Sira eliwa nain Mua Maneka kema suuwap naap onowa-ke. Aria niar fuuniwkin nos-ke maa-ko wia asipeya wi wueliwa ikiwuk. 7 Wi Yeesus uuwowa muuta nain soomaremi nan ikiwimik. Aria wi Yeesus opora me wiar opimik nain-ko yia asipuk naep me wia maakimik, weetak. 8 Naapeya i Yeesus teeria-ke wi uuwow mua nain wia tetarowa-ke eliwa. Naeya i unowiya wapena yiam yiemi epaskun uuwamkun opor makena uuwowa ikim-ikainon.

9 Ni sios teeria parosifa nia siisimomam. Nain Diotrefes-ke wame purupemi yo woos mua-ke wame naiya. Neemi i opora yiar fieniya. 10 Naapeya ikoka yena ikiwemi o sira oniya nain ariman wiar wuinen. Feenap oniya, opor samora yia onami wadol opora yia maiya. Ne me nain muutiw, Yeesus teeria papako wiar kererimik nain me wia tetariya. Ne mua papako-ke wia tetarimik nain naap me oneka naep wiar puukiya. Naeya wi kekanep onimik nain wia iirariya, yiamiya lotu me areka wia naiya.

11 Emar emawa, no sira samora me ooke, sira eliwa muutiw ooke. Mua eena sira eliwa oniya nain Mua Maneka kemena-pa wiar ikaiya, ne mua sira samora oniya nain Mua Maneka-ko me urufiya. 12 Wi mua unowa Demitrius sira eliwa-ke naimik, opor makena ookiya. Ne is pun naap maimik. Ne i yia amisaren, opora maimik nain makena.

13 Yo opor unowa efar ikua, nain parosifa-pa nefa maakowa miatiniyem. 14 Yo kookalowa-ke feenap, epa me ekowa nefa urufowa maem-ikaiyem. Ikoka yena ikiwep opor unowa nefamiya aakuninen.

15 Aria no kema sonom eliwiw ike nefa naiyem. Nena nomar unowa fan ikemik nain eliwa ike nefa naimik. Aria yena emar unowa nan ikemik nain unowiya mua kui-kuisow eliwa ikeka wia naiyem, naap wia maakome.